Մեր մասին

Ողջունում ենք ձեզ Հայկական ուռուցքաբանական կոնգրեսի պաշտոնական կայքէջում:

ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնի գործունեության առանցքում իր նշանակալից դերն ունի Հայաստանում ուռուցքաբանության բազմակողմանի զարգացումը:

Հաշվի առնելով մասնագիտական քննարկումների կարևորությունը, ինչպես նաև գիտելիքների փոխանակումն ու բուժման նոր մեթոդների ներկայացումը ուռուցքաբան գործընկերներին՝ Ուռուցքաբանության ազգային կենտրոնը, տնօրեն Նարեկ Մանուկյանի նախաձեռնությամբ, 2021 թվականից որոշել է անցկացնել ամենամյա գիտագործնական միջոցառում՝ «Հայկական ուռուցքաբանական կոնգրես»:

Կոնգրեսի նպատակն է Հայաստանում քաղցկեղի դեմ պայքարի քաղաքականության ու ռազմավարության քննարկումը, քաղցկեղի կանխարգելման, վաղ ախտորոշման, բուժման նոր մեթոդների և մոտեցումների ներկայացումը, ինչպես նաև միջազգային առաջատար մասնագետների հետ փորձի փոխանակումը:

Ամենամյա կոնգրեսին զեկույցներով հանդես են գալիս ավելի քան 50 մասնագետներ ինչպես Հայաստանից, այնպես էլ արտերկրից: «Հայկական ուռուցքաբանական կոնգրես»-ին մասնակցում են 300-ից ավելի պատվիրակներ՝ աշխարհում ուռուցքաբանության ոլորտում առաջատար կլինիկաների բժիշկներ, ՀՀ Առողջապահության նախարարության, Երևանի պետական բժշկական համալսարանի և Առողջապահության ազգային ինստիտուտի ներկայացուցիչներ, հանրապետության ԲԿ-ների ղեկավարներ, տարբեր մասնագիտացման բժիշկ-ուռուցքաբաններ, հանրային առողջապահության մասնագետներ, ազգային առողջապահական ծրագրեր իրականացնողներ, գիտահետազոտական աշխատանքով զբաղվողներ, ուռուցքաբան-օրդինատորներ և այլն:

Կոնգրեսը ծառայում է որպես բարձր կրթական հարթակ յուրաքանչյուր երիտասարդ և անգամ կայացած մասնագետի համար: Ուռուցքաբանության ազգային կենտրոնի համար առաջնային դեր ունի երկրում մասնագիտական առաջընթացը: Կարևորելով նեղ-մասնագետների շարունակական կրթությունը, ոլորտում տարբեր գիտական աշխատանքների անհրաժեշտությունը՝ «Հայկական ուռուցքաբանական կոնգրես»-ի ավարտին երեք լավագույն զեկուցողներին տրամադրվում է գիտաթոշակ։ Լավագույն զեկույցներն ընտրվում են հենց Կոնգրեսի ընթացքում՝ բոլոր մասնակիցների անանուն, օնլայն քվեարկությամբ։ Գիտաթոշակի գումարը տրամադրվում է բացառապես հետագա գիտական առաջխաղացման նպատակով՝ բարձր վարկանիշով գիտական հանդեսներում տպագրվելու, արտերկրում գիտաժողովներին և թրեյնինգներին մասնակցելու և այլնի համար։

Պատմական ակնարկ

Փետրվար ամիսը համարվում է քաղցկեղի կանխարգելման ամիս: Փետրվարի 4-ն աշխարհում նշվում է որպես Քաղցկեղի դեմ պայքարի միջազգային օր։ Հենց այս առիթով էլ «Հայկական ուռուցքաբանական կոնգրես»-ը անցկացվում է յուրաքանչյուր տարի փետրվար ամսին:

Առաջին «Հայկական ուռուցքաբանական կոնգրես»-ը տեղի է ունեցել 2021 թվականի փետրվարի 6-7-ը Ծաղկաձոր քաղաքում: Այն կրել է «Խնդիրներ, ձեռքբերումներ, զարգացման տեսլական» խորագիրը:

Երկրորդ «Հայկական ուռուցքաբանական կոնգրես»-ը անցկացվել է 2022 թվականի 3-4-ը ՌԴ Սոչի քաղաքում և կրել «Հայկական ուռուցքաբանություն. նպատակներ և իրականացման ուղիներ» խորագիրը:

Երրորդ «Հայկական ուռուցքաբանական կոնգրես»-ը անցկացվել է փետրվարի 4-5-ը Երևան քաղաքում: 2023 թվականի կոնգրեսի խորագիրն է՝ «Հայկական ուռուցքաբանություն. ձեռքբերումներ և նպատակների նոր սանդղակներ»:

Չորրորդ «Հայկական ուռուցքաբանական կոնգրես»-ը անցկացվել է 2024թ. փետրվարի 2-5-ին Հայաստանի տեսարժան վայրերից մեկում` Ջերմուկ քաղաքում։ Կոնգրեսը կրում էր «Ընթացիկ հաջողություններ և նոր մարտահրավերներ» խորագիրը։

Հայկական ուռուցքաբանական 5-րդ կոնգրեսը հոբելյանական էր, անցկացվեց 2025թ. փետրվարի 1-2-ը Ծաղկաձորի «Էյքի Էյթ» հյուրանոցային համալիրում։ Այն տարբերվում էր մինչև այս անցացված կոնգրեսներից իր մասշտաբով։ Կոնգրեսում ընդգրկված էին մոտ 150 զեկույցներ, «կլոր սեղաններ» և 500-ից ավելի մասնակիցներ՝ ՀՀ Առողջապահության նախարարության, Երևանի պետական բժշկական համալսարանի և Առողջապահության ազգային ինստիտուտի ներկայացուցիչներ, հանրապետության ԲԿ-ների ղեկավարներ, տարբեր մասնագիտացման բժիշկ-ուռուցքաբաններ, հարակից մասնագիտացումներով բժիշկներ, հանրային առողջապահության մասնագետներ, ազգային առողջապահական ծրագրեր իրականացնողներ, գիտահետազոտական աշխատանքով զբաղվող մասնագետներ և այլք:

2026 թվականին, լավագույն ավանդույնթները պահպանելով,  կանցանցվի Հայկական ուռուցքաբանական 6-րդ կոնգրեսը։ Այս անգամ խորագիրը կլինի «Համաձակ ծրագրերից դրանց իրագործում», ընդգծելով ՈՒԱԿ-ի վերջին տարիների ձեռքբերումներն ու ոլորտի բարեփոխումները։ 

«Հայկական ուռուցքաբանական երրորդ կոնգրես»-ի մասնակիցներին կտրվի ՇՄԶ տեսական կրեդիտ:

Կոնգրեսի աշխատանքային լեզուներն են՝ հայերեն, ռուսերեն, անգլերեն:

«Հայկական ուռուցքաբանական կոնգրես»-ի բոլոր մասնակիցներին հանձնվում են մասնակցության հավաստագրեր: